2023 წლის ზაფხულის სანავიგაციო სეზონზე, საქართველოსა და უზბეკეთის რესპუბლიკას შორის ფრენების სიხშირე იზრდება, – ინფორმაციას სამოქალაქო ავიაციის სააგენტო ავრცელებს.
უზბეკური დაბალბიუჯეტური ავიაკომპანია CENTRUM AIR -ი თბილისი ტაშკენტი ტაშკენტი თბილისი –ს მიმართულებაზე იწყებს ოპერირებას. ავიაკომპანია პირდაპირ ჩარტერულ ავიარეისებს 2023 წლის ზაფხულის სანავიგაციო სეზონზე, 13 მაისიდან შემოგვთავაზებს. ფრენები კვირაში ერთი სიხშირით, შაბათ დღეს შეასრულდება.
Centrum Airlines -ის ფრენის განაცხადი სამოქალაქო ავიაციის სააგენტომ მიმდინარე წლის აგვისტოს ბოლომდე დააკმაყოფილა.
Centrum Air ახალი დაბალბიუჯეტიანი ავიაკომპანიაა, რომელიც ფრენებს ახორციელებს როგორც შიდა, ისე საერთაშორისო მარშრუტებზე. ავიაკომპანია 2023 წლის ბოლოსთვის თავისი ფლოტის გაზრდას 20 თვითმფრინავამდე გეგმავს, ხოლო 2026 წლისთვის კი – 100-მდე. კომპანიის მიზანია მგზავრებს შესთავაზოს მაღალი ხარისხის ფრენები რაც შეიძლება დაბალ ფასად.
ამ ეტაპზე საქართველოსა და უზბეკეთის დედაქალაქებს შორის რეგულარულ რეისებს ავიაკომპანია Uzbekistan Airlines -ი ასრულებს. ავიაკომპანია ფრენებს თბილისი-ტაშკენტი-თბილისის მიმართულებით კვირაში სამჯერ ახორციელებს.
შეგახსენებთ, რომ უზბეკეთის ავიახაზები საქართველოს საავიაციო ბაზარზე 2019 წელს შემოვიდა.
