ქუთაისის აეროპორტი ევროპაში მგზავრთნაკადის ზრდით მეორე ადგილზეა

ქუთაისის საერთაშორისო აეროპორტის პოპულარობა და მასზე მოთხოვნა დღითიდღე იზრდება. იქედან გამომდინარე, რომ ამ აეროპორტში ძირითად ფრენებს დაბალბიუჯეტური ავიაკომპანიები ასრულებენ, მგზავრების რაოდენობის მაჩვენებელიც საკმაოდ დიდია.

სწორედ ამიტომ, ქუთაისის საერთაშორისო აეროპორტი ევროპაში მგზავრთნაკადის ზრდით მეორე ადგილზე გავიდა. ევროპის აეროპორტთა საერთაშორისო საბჭოს (ACI EUROPE) მონაცემებით, 2019 წელს ქუთაისის საერთაშორისო აეროპორტს 2018 წელთან შედარებით მგზავრთა ნაკადის 41.6%-იანი ზრდა ჰქონდა. საუბარია იმ აეროპორტებზე, რომელთა მგზავრთა ნაკადი 5 მილიონზე ნაკლებია.

რეიტინგში ქუთაისის საერთაშორისო აეროპორტი გასულ წელსაც ლიდერობდა 52,5 %-იანი ზრდით. წელს კი პირველი ადგილი ჩრდილოეთ მაკედონიის ქალაქ ოჰრიდის აეროპორტმა დაიკავა ( +72.1%) .

იმ აეროპორტების რეიტინგში კი, სადაც მგზართა ნაკადი 25 მილიონს აჭარბებს, ზრდის ყველაზე მაღალი მაჩვენებლით ვენა ლიდერობს (+17.1%) . მეორე კატეგორიაში, სადაც მგზავრთა ნაკადი 10-25 მილიონამდეა, კიევის ბორისპოლის აეროპორტი იკავებს პირველ ადგილს (+21.1%) , მესამე კატეგორიაში კი (5-10 მილიონი მგზავრი) – კრაკოვის აეროპორტი ლიდერობს 24.2%-იანი ზრდით.

აღსანიშნავია, რომ 2019 წელს საქართველოს ხუთივე აეროპორტი 5.2 მილიონზე მეტ მგზავრს მოემსახურა, რაც 3.5 %-იანი ზრდა იყო 2018 წელთან შედარებით.