ალბათ ყველას გაგვჩენია კითხვა თუ რა ხდება მაშინ, როდესაც გიგანტური ფოლადის ფრინველები თავიანთ ბოლო რეისს ასრულებენ? უმეტესად ისინი თვითმფრინავების “სასაფლაო”–ზე ხვდებიან, მაგრამ ლაინერების ის კატეგორიაც არსებობს, რომელთაც ბევრად უფრო საინტერესო ბედი ელით.
ევროპის მასშტაბით დღითი-დღე მეტად პოპულარული და ტრენდული ხდება ძველი თვითმფრინავების სასტუმროებად, კაფეებად ან რასტორნებად გადაკეთება და ახალი სიცოცხლის ჩუქება.
ეს არის ავიაციის ახალი სუნთქვა, რომელიც ტურისტებს საშუალებას აძლევს, ფრენის შიშის გარეშე გამოსცადონ ბორტზე ყოფნის მაგია.
რატომ არის ეს ევროპაში ტრენდული
ევროპის ზოგიერთი ქვეყანა, მაგალითად როგორებიცაა შვედეთი, ნიდერლანდები, ჩეხეთი და საფრანგეთი, ყოველთვის გამოირჩეოდნენ ინოვაციური მიდგომებით ტურიზმში. ძველი ხომალდების რესტავრირება და მათი სტაციონარულ ობიექტად გადაქცევა არა მხოლოდ ეკომეგობრული გადაწყვეტილებაა (ნარჩენების შემცირების კუთხით), არამედ საკმაოდ კარგი მარკეტინგული სვლაა. თანამედროვე ადამიანებს რომლებიც აქტიურები არიან სოციალურ ქსელებსა და სხვადასხვა სოციუმებში მობეზრდათ სტანდარტული სასტუმროს ნომრები და უფრო მეტად ესთეტიკურ, ინსტაგრამულ გამოცდილებას ეძებენ. გარდა ამისა, ეს პროექტები ხშირად ადგილობრივი ეკონომიკის სტიმულირების წყაროც ხდება, რადგან ისინი ათასობით „ავიამანიაკსა“ და ცნობისმოყვარე ტურისტს იზიდავენ.
„Jumbo Stay“ შვედეთში – ღამისთევა ბოინგში
თუ ოდესმე გიოცნებიათ პილოტის ადგილას ყოფნასა და მის სავარძელში დაძინებაზე, მაშინ სტოკჰოლმი, არლანდას აეროპორტთან მდებარე სასტუმრო Jumbo Stay თქვენთვისაა. ეს არის 1976 წელს გამოშვებული Boeing 747-212B, რომელიც 2009 წელს ჰოსტელად და სასტუმროდ გადაკეთდა, რომელიც ნამდვილად სრულფასოვანია.
აქ შეხვდებით როგორც ბიუჯეტურ ოთახებს, ისე ლუქს ნომერსაც, რომელიც პირდაპირ პილოტების კაბინაშია მოწყობილი. წარმოიდგინეთ, იღვიძებთ იქ, სადაც ერთ დროს ასობით ღილაკი და საჭე იყო, ფანჯრიდან კი აეროპორტის ასაფრენ ბილიკს ხედავთ. ეს ადგილი შვედეთის სავიზიტო ბარათად იქცა საავიაციო ენთუზიასტებისთვის. აღსანიშნავია ის ფაქტიც, რომ თვითმფრინავის ფრთაზე მოწყობილია სადამკვირვებლო ტერასა, სადაც სტუმრებს ყავის დალევა და თვითმფრინავის აფრენისა და დაჯდომის ყურება შეუძლიათ.
ფუფუნება ნიდერლანდების ცაში (და მიწაზე)
ნიდერლანდები კიდევ ერთი ქვეყანაა, სადაც ავიაცია და დიზაინი ერთმანეთს საოცრად ერწყმის. ქალაქ ტეგეში მდებარეობს სასტუმრო, რომელიც საბჭოთა პერიოდის თვითმფრინავშია აწყობილი – Ilyushin 18.
ეს 40 მეტრიანი ლაინერი მდიდრულ ლუქს ნომრადაა გადაკეთებული. მასში ყველაფერია: ჯაკუზი, საუნა, ბარი და ტერასა, საიდანაც აეროდრომს ხედავთ. ეს პროექტი მაგალითია იმისა, თუ როგორ შეიძლება ცივი ომის დროინდელი ტექნიკა თანამედროვე ევროპული კომფორტის სიმბოლოდ იქცეს. აღსანიშნავია, რომ თვითმფრინავის კაბინა ხელუხლებელია, რაც სტუმრებს საშუალებას აძლევს, თავი კაპიტნად იგრძნონ.
ჩეხური კრეატივი: ვახშამი თვითმფრინავში
თუ ჩეხეთში მოგზაურობას გადაწყვეტთ, აუცილებლად უნდა ეწვიოთ ქალაქ ოლომოუცს ან ლიბერეცის მიმდებარე ტერიტორიას, სადაც ძველი საბჭოთა და ევროპული ლაინერები რესტორნებად არის ქცეული. ერთ-ერთი ყველაზე ცნობილია Letoun Koněšín, სადაც თვითმფრინავი Tupolev Tu-154 სტუმრებს არაჩვეულებრივი კერძებით მასპინძლობს.
ჩეხეთში ამგვარი ლოკაციები ხშირად გზატკეცილების მახლობლად არის განთავსებული, რაც მათ ავტო მოგზაურებისთვის იდეალურ წასახემსებელ ადგილად აქცევს. თვითმფრინავის ინტერიერში ორიგინალი სავარძლების ნაწილი და ილუმინატორები შენარჩუნებულია, ეს კი სადილს დაუვიწყარ გამოცდილებად აქცევს.
კაფეები და რესტორნები: სადილი ღრუბლებს მიღმა
თუ თვითმფრინავში ღამისთევა ზედმეტად ექსტრემალურად გეჩვენებათ, ევროპაში უამრავი საავიაციო კაფე არსებობს. მაგალითად, საფრანგეთში და გერმანიაში ხშირად შეხვდებით პატარა თვითმფრინავებს, რომლებიც ქალაქის პარკებში ან გზატკეცილებზე კაფეებად არის გადაქცეული. აქ ინტერიერი მაქსიმალურად ინარჩუნებს საავიაციო დეტალებს, ეს კი მათი მტავარი ხიბლია. ილუმინატორებიდან ყურება, სადილობა თვითმფრინავის მაგიდებზე და ბორტგამცილებლის ფორმაში გამოწყობილი მომსახურე პერსონალი ილუზიას ქმნის, რომ თქვენი რეისი სულ მალე აფრინდება.
რჩევები მოგზაურებისთვის
თუ გადაწყვეტთ, რომ თქვენი შემდეგი ევროპული ტურის დროს საავიაციო სასტუმროებში გსურთ დარჩენა გაითვალისწინეთ რამდენიმე რჩევა:
- დაჯავშნეთ ადრე: ასეთ ლოკაციებზე ნომრების რაოდენობა შეზღუდულია (ზოგჯერ მხოლოდ ერთი ლუქსია მთელ თვითმფრინავში), ამიტომ ჯავშანი 3-4 თვით ადრე გააკეთეთ, ასევე მნიშვნელოვანია წინასწარ დაჯავშნოთ ავიაბილეთები
- შეამოწმეთ მდებარეობა: საავიაციო სასტუმროები ხშირად ქალაქის ცენტრიდან მოშორებით, აეროპორტებთან ან ავტომაგისტრალებთან მდებარეობს. დაგეგმეთ ტრანსპორტირება წინასწარ.
- ფასები: მსგავსი ეგზოტიკა იაფი არ არის. მაგალითად, ნიდერლანდების ილუშინში ღამისთევა 350-400 ევრომდე დაგიჯდებათ, თუმცა შვედეთის ჰოსტელში საწოლის პოვნა 50-70 ევროდაც შეგიძლიათ.
- ფოტო-აღჭურვილობა: არ დაივიწყოთ ფართოკუთხიანი ლინზა – თვითმფრინავის ინტერიერი ვიწროა და კარგი კადრებისთვის ეს აუცილებელია.
თვითმფრინავების მეორე სიცოცხლე არის საუკეთესო მაგალითი იმისა, თუ როგორ შეიძლება ტექნიკური პროგრესი და კრეატივი გაერთიანდეს. ევროპის ქვეყნები ამ ტრენდს აქტიურად ავითარებენ, რაც მოგზაურებს საშუალებას აძლევს, ავიაციას სრულიად სხვა კუთხით შეხედონ. ეს არ არის მხოლოდ ღამისთევა, ეს არის მოგზაურობა დროში და ინჟინერიის საოცრებაში.
Avia.ge – თქვენი მოგზაურობის ერთგული მეგობარი. დაგვირეკე: 551 907 907
