ვენეცია – მარტივი გზამკვლევი მოგზაურობის დაგეგმვისთვის

სან მარკოს უბანი ( San Marco) – ქალაქის გული, აქ თავმოყრილია ყველა მთავარი ღირსშესანიშნაობა და უამრავი სავაჭრო და კვების ობიექტი. იდეალურია პირველად დამსვენებლებისთვის. აქაურობა კომფორტული და თანაც ულამაზესია.

სან პოლო ( San Polo) – სან პოლო ვენეციის ყველაზე პატარა ცენტრალური უბანია.  სადგურსა და ცნობილ რიალტოს ხიდს შორის მდებარე ეს ტერიტორია ქალაქის თითქმის ნებისმიერ ნაწილამდე მარტივ წვდომას გთავაზობთ – ფეხით სეირნობისას თუ წყლის ავტობუსით.

კანარეჯიო ( Cannaregio) – კანარეჯიო ვენეციის ერთ-ერთი ყველაზე დიდი უბანია, მის დასავლეთ ნაწილში მდებარეობს სანტა ლუსიას რკინიგზის სადგური და ძალიან მოსახერხებელია საზოგადოებრივი ტრანსპორტისთვის. თუ ეძებთ კარგ სასტუმროს, სადაც მარტივად მიხვალთ, ეს უბანი თქვენთვის ზედგამოჭრილია თანაც, აქ ვენეციის რამდენიმე ცნობილი ღირსშესანიშნაობა მდებარეობს. მთავარი არხები კი სავსეა რესტორნებით, რომლებიც განსაკუთრებით პოპულარულია მზის ჩასვლის დროს.

კასტელო (Castello) – თუ ცენტრში უფრო მშვიდ გარემოს ეძებთ, კასტელოს უბანი ფანტასტიკური ვარიანტია. ის გთავაზობთ წყნარი საცხოვრებელი ქუჩების, მომხიბვლელი არხების და ყველა მთავარი ღირსშესანიშნაობის მარტივად ნახვის საშუალებას. ამ ტერიტორიაზე ასევე ბევრი მწვანე სივრცეა, სადაც განტვირთვას შეძლებთ.

სანტა კროჩე ( Santa Croce) – ეს უბანი პრაქტიკული არჩევანია, რადგან იგი ახლოსაა პიაცალე რომასთან (მთავარ ავტობუსების სადგურთან) და სანტა ლუჩიას რკინიგზის სადგურთან. მიუხედავად იმისა, რომ სხვა ადგილებისგან განსხვავებით თვალწარმტაცი არ არის, მდებარეობა ვენეციის შესანიშნავ ლოკაციად აქცევს. განსაკუთრებით მოსახერხებელია, თუ მხოლოდ რამდენიმე ღამით დარჩენას გეგმავთ.

წმინდა მარკოზის ბაზილიკა საოცარი კულტურული ძეგლი ვენეციის მთავარ მოედანზე მდებარეობს და სასახლეთა რიგთან ერთად კულტურული ღირსშესანიშნაობების ანსამბლს ქმნის. იგი ბიზანტიური არქიტექტურის ნიმუშია. ტაძრის თაღები და მოზაიკები აუცილებლად დიდხანს გემახსოვრებათ. ეს ტაძარი ცალსახა ნიმუშია იმისა, თუ რა დიდებული იმპერიების მემკვიდრეა ვენეცია.

დოჟების სასახლე მთავარ მოედანზე შეგხვდებათ. იგი იტალიური რენესანსის დროს აშენდა. შენობას დიდი პოლიტიკური ფუნქცია ჰქონდა და სახელმწიფოებრივ სტაბოლურობაში დიდხანს წამყვან როლს ასრულებდა. დღეს კი ვენეციის ერთ-ერთი ღირსშესანიშნაობაა თავისი ულამაზესი თაღებითა და ლოჟებით.

La Fenice ოპერის თეატრი აუცილებლად უნდა მოინახულოთ ვენეციაში ყოფნისას. ეწვიეთ მარია კალასის გამოფენას, რომელიც ცნობილი სოპრანოს ვენეციურ წლებზე მოგითხრობთ. აუდიო გიდის დახმარებით დაათვალიერეთ ფოიე, თეატრის ჰოლი და აპოლონიური დარბაზები, რათა ოპერის, თეატრალური ვენეციის ნამდვილი გემო შეიგრძნოთ!

ოხვრის ხიდზე თუ გადაივლით, დაახლოებითი წარმოდგენა შეიძლება შეგექმნათ იმაზე, თუ რას განიცდიდნენ იტალიელი პატიმრები დოჟის სასახლიდან სატუსაღომდე გზაზე. ეს ხიდი ბაროკოს სტილშია შესრულებული. სიტყვა ოხვრა კი მის სიმბოლურ შინაარსზე მიუთითებს.

წმინდა მარკოზის სამრეკლო იდეალური ადგილია ვენეციის ხედების დასათვალიერებლად. იმგზავრეთ ლიფტით და გადმოხედეთ ქალქს სამრეკლოდან, თქვენ თვალწინ ქალაქის თვალწარმტაცი პეიზაჟები გადაიშლება.

მურანოსა და ბურანოს კუნძულები სხვა თვალით დაგანახებენ ვენეციას. მეთევზეების ფერადი სახლები და ვენეციის ულამაზესი ხედები თქვენს მოგზაურობას დაუვიწყარს გახდის. მოინახულეთ მურანოსა და ბურანოს ისტორიული კუნძულები და იმოგზაურეთ ნამდვილი ვენეციელივით.

გონდოლების ტური ნამდვილი ვენეციელივით გაგატარებინებთ დროს. უგზო ქალაქში ნავები დომინირებენ. ყველა მოგზაურმა ვენეცია ​​გონდოლით ერთხელ მაინც უნდა დაათვალიეროს. ეწვიეთ გონდოლების გალერეას, რათა გაიგოთ, თუ როგორ მზადდება ვენეციის ცნობილი ნავები. იხილეთ ორიგინალური ხელსაწყოები და ტრადიციული ხელოსნობის ნიმუშები. შემდეგ კი გაისეირნეთ გონდოლით ვენეციის არხებში და გაეცანით ქალაქის ისტორიასა და ტრადიციებს.

ეს ტაძარი შუასაუკუნეებში აშენდა ვენეციაში შავი ჭირისაგან გათავისუფლების სადღესასწაულოდ. მისი არქიტექტურული მხარე შთამბეჭდავია, სიმბოლურ მნიშვნელობასთან ერთად. დღეს ტაძარი ტურისტების ერთ-ერთ საყვარელ ადგილს წარმოადგენს.

ვენეციის მურანო და შუშის ქარხანა მნახველებს იდეალურ ტურს პირდება იმის სადემონსტრაციოდ, თუ როგორ მზადდება ულამაზესი ვენეციური მინები. ხელოვნების დონეზე აყვანილი ეს ხელობა ბევრი ვენეციელის პროფესიაა. ეს საქმე ადგილობრივებს განსაკუთრებით უყვართ.

Quadri – რესტორანი წარმოგიდგენთ ტრადიციულ ვენეციურ კერძებს, რომლებსაც შეფ-მზარეული თანამედროვე შტრიხებით აფორმებს. ის ზღვის ინგრედიენტებზე ამახვილებს ყურადღებას, როგორიცაა ადგილობრივი თევზი ან სეზონური მოლუსკები. ღვინის რეკომენდაციისთვის პერსონალს მიმართეთ – ღვინის ვრცელ და მრავალფეროვან სიაში უჩვეულო ეტიკეტებს აღმოაჩენთ.

Il Ridotto – წმინდა მარკოზის მოედნიდან და ოხვრის ხიდიდან სულ რამდენიმე ნაბიჯში, პატარა მოედანზე, ეს რეტორანი ფერადი და თბილი ატმოსფეროთი დაგხვდებათ. ადგილობრივ და სეზონურ პროდუქტებზე დაფუძნებული სამზარეულო აუცილებლად მოგხიბლავთ. არ გამოტოვოთ ბერგამოტის, ციტრუსისა და გრეიფრუტის არომატით დამზადებული თეთრი შოკოლადის დესერტი. რესტორანს დამსახურებულად აქვს მიშელინის ვარსკვლავი.

Terrazza Danieli – ამ რესტორნით ფოტოებიდანაც კი აღფრთოვანდებით. მიშელინის ვარსკვლავით დაჯილდოვებული ულამაზესი ადგილი ტურისტების ფავორიტი დამსახურებულადაა. მის კულმინაციას სწორედ გარე ტერასა წარმოადგენს, საიდანაც 180°-იანი ხედი იშლება. მენიუ რეგულარულად იცვლება სეზონების მიხედვით და შეიცავს ახალ, ადგილობრივ ინგრედიენტებს.

Gelato di Natura – ეს სანაყინე რამდენიმე მიზეზის გამო გამოირჩევა – ნაყინის ტექსტურა,  არომატები და არჩევანის მრავალფეროვნება აქაურობას პოპულარობას სძენს. ეს მაღაზია 4 ლოკაციაზე შეგიძლიათ ნახოთ ვენეციაში, ამიტომ კომფორტულია ტურისტებისთვის.

Gelateria Gallonetto –  პატარა სანაყინეა, სადაც მხოლოდ რამდენიმე ადამიანისთვის არის საკმარისი ადგილი ერთდროულად. ნაყინი მზადდება ახალი, მაღალი ხარისხის ინგრედიენტებით, რაც არომატებს ნამდვილად გამორჩეულს ხდის. ეს სანაყინე ორიენტირებულია კლასიკურ არომატებზე, როგორიცაა სტრაჩატელა, ამარენა, ნოჩოლა (თხილი) და ფისტა. ეს პოპულარული ადგილია, ამიტომ მოემზადეთ ლოდინის დროისთვის, მაგრამ ნამდვილად ღირს!

Suso – 2010 წელს გახსნის შემდეგ, Suso-მ ვენეციის ნაყინის სცენა შტურმით დაიპყრო და სწრაფად გახდა ქალაქის ყველაზე პოპულარული სანაყინე. მისი არომატები და ხარისხიანი ინგრედიენტები შთამბეჭდავია. ისინი გვთავაზობენ ტრადიციული და კრეატიული ვარიანტების ნაზავსა თუ ორიგინალურ მიგნებებს.

Osteria Al Cantinon –  რესტორნის ტერასიდან გონდოლების ყურება საღამოს გასატარებლად იდეალური ვარიანტია. გირჩევთ, რომანტიკული საღამოსთვის აქ გარეთ დასაჯდომი ადგილები დაჯავშნოთ. მათი მენიუ ორიგინალური და ტრადიციული ვენეციური კერძების ნაზავს წარმოადგენს.  აქ შეგიძლიათ გასინოთ ტრიუფელის რიზოტო და ზღვის კერძები.

Trattoria Antiche Carampane –  ეს რესტორანი ქალაქის საუკეთესო რესტორნებს შორის ითვლება. მიუხედავად იმისა, რომ ელიტური რესტორანია, მან შეინარჩუნა თავისი რომანტიკული, ძველი სამყაროს ხიბლი. ზღვის პროდუქტები მენიუს ცენტრალურ ნაწილს წარმოადგენს.

Ristorante Da Carletto – დოჟების სასახლიდან და წმინდა მარკოზის მოედნიდან სულ რაღაც რამდენიმე წუთის სავალზე მდებარეობს ვენეციის ეს ერთ-ერთი ყველაზე რომანტიკული რესტორანი. მასიური ხის ძელები, ვინტაჟური დეკორი და აგურით მოპირკეთებული ბუხრები შუა საუკუნეებში გამოგზაურებთ. ამავდროულად, ნაზი განათება და გამოქვაბულის მსგავსი გარემო მას ძალიან ინტიმურ და მყუდრო ატმოსფეროს სძენს. მენიუ კი ნებისმიერი სტუმრის გემოვნებას მოერგება.

Piazza San Marco boutique stores – ეს ბუტიკები წმინდა მარკოზის მოედანზეა მიმოფანტული. ისინი შესანიშნავი ადგილია შოპინგისთვის, განსაკუთრებით თუ ექსკლუზიურ ვენეციურ სუვენირებს ეძებთ. კაფეებთან და ბაზილიკის ხედებთან ერთად, აქაურობა საკმარისია იმისთვის, რომ მთელი დღე შოპინგს დაუთმოთ.

Rialto – ეს ბაზრობა ყველაზე ცნობილია ვენეციაში. იგი საუკუნეებს ითვლის. ადრეული დილით აქ გამოსვლა და ადგილობრივი პროდუქტების შეძენა ვენეციელებისთვის ტრადიციად ქცეული ერთგვარი სიამოვნებაა.

Marghera Market –  მარგერას უბნის ცენტრში მდებარე ბაზარი, სადაც საკვებს, აქსესუარებსა და სხვა ნივთებს იპოვით. რადგან ეს ძირითადად საკვების ბაზარია, ხილისა და ბოსტნეულის არჩევანი განსაკუთრებით შთამბეჭდავია. საკვების გარდა, აქ ნახავთ ტანსაცმელს და სახლის დეკორაციებს. გაითვალისწინეთ, რომ ეს ბაზარი კვირაში მხოლოდ ორჯერ იმართება.

Calle larga XXII marzo – თუ გსურთ, შოპინგს მიუძღვნათ თქვენი დღე, აუცილებლად ეწვიეთ ამ ადგილს. ამ ქუჩაზე მდებარეობს ყველაფერი – მაღალი კლასის ბუტიკებიდან დაწყებული, სუვენირების მაღაზიებისა თუ საერთაშორისო ბრენდების მაღაზიებით დამთავრებული.

წყლის ავტობუსი არა მხოლოდ გადააგილების საშუალება, არამედ ვენეციის დათვალიერების ერთ-ერთი საუკეთესო ვარიანტიცაა. იგი საკმაოდ პოპულარული ტრანსპორტია ქალაქში. ერთჯერადი ბილეთი 10 ევრომდე ღირს, მთელი დღის ბილეთს კი 25 ევროდ შეიძენთ.

გონდოლებით გადაადგილება კი უფრო ტურისტული ვარიანტია. არ უნდა დაგენანოთ ფინანსები ვენეციის მთავარ არხზე გონდოლათი სასეირნოდ. მისი ტური რამდენიმე წუთს გრძელდება და ქალაქს საერთოდ სხვა პერსპექტივიდან განახებთ. ყველაზე იაფად 60 ევროდან შეგიძლიათ გონდოლათი მგზავრობა.

პაპადოპოლის ბაღები (Papadopoli Gardens) – ეს ის ბაღია, სადაც დამღლელი დღის შემდეგ იდეალურად განტვირთვას შეძლებთ. 1800-იანი წლების ბოლოს ეს გრაფ სპირიდიონე პაპადოპოლისა და მისი მეუღლის პირადი ბაღი იყო. ვენეციის ეს ნაწილი პირველი მსოფლიო ომის დროს ბომბმა დაბომბა. იქ ბევრი ხეა, მათ შორის რამდენიმე მუხა, რაც ზაფხულის სიცხესა და ქალაქის ხმაურს ახშობენ და ანეიტრალებენ.

სავორნანის პარკი (Parco Savorgnan) -ეს ბაღი ერთხანს კერძო საკუთრებას წარმოადგენდა. იგი ძალიან დიდ სივრცეზეა გადაჭიმული და მოიცავს დასასვენებელ ზონებს, ბავშვებისათვის მოწყობილ სპეციალურ სივრცეებსა და ბუნების ულამაზეს ელემენტებს.

რეცონიკოს ბაღი ( Giardino Ca’ Rezzonico) – თუ ბავშვებთან ერთად მოგზაურობთ, მაშინ ეს სივრცე იდეალურია თქვენთვის. ამ მყუდრო გარემოში თქვენ შეძლებთ დასვენებას, ბავშვები კი – გართობას.

მარინესას ბაღები (Giardini della Marinaressa) – ამ პარკში ხელოვნების ნიმუშებს დაათვალიერებთ. აქაური სკულპტურები და ულამაზესი ბუნება ტურისტებისთვის ერთგვარი თავშესაფარია დამღლელი ტურების შემდეგ.

ხსოვნის პარკი (Parco delle Rimembranze) – ჯუდეკას არხის გასწვრივ 30 წუთიანი გასეირნებისას სრულიად განსხვავებულ ვენეციას აღმოაჩენთ. ეს ადგილი ძალიან განსხვავდება ვენეციის დანარჩენი ნაწილისგან ფართო ქუჩებითა და თანამედროვე საცხოვრებელი კორპუსებით. აქ ვენეციის ულამაზესი მცენარეები დაგხვდებათ. პარკში მოწყობილია მოედნები და გასართობი სივრცეები.

3-4 დღე მაინც უნდა გათვალოთ ქალაქში ყოფნისათვის, რათა ბოლომდე შეძლოთ მისი ღირსშესანიშნაობების მონახულება.

პირველ რიგში, ფრენისათვის საჭირო ნივთების წაღება არ დაგავიწყდეთ, იქნება ეს დოკუმენტები, პასპორტი თუ კომფორტული ბალიში. ასევე, შეამოწმეთ ყველა გაჯეტი და დამტენი. ვენეციაში ბევრი სიარული მოგიწევთ, ამიტომ სპორტული ფეხსაცმელი და კომფორტული ტანსაცმელი აუცილებელია.

ვენეცია იტალიის ერთ-ერთი გამორჩეული ქალაქია. იტალიურ სულს აბსოლუტურად გამოხატავს მისი ღირსშესანიშნაობები და ყველა ტიპის მოგზაურისათვის იდეალურ გარემოს ქმნის.

ვენეციაში მოგზაურობა ევროპის ბიუჯეტურ ქალაქებთან შედარებით შეიძლება ძვირი მოგეჩვენოთ, თუმცა შედარებით არასეზონურ პერიოდებში აქ ძალიან ბიუჯეტურად შეძლებთ დასარჩენი ადგილების ნახვას.

ვენეცია საკმაოდ უსაფრთხო ადგილია ტურისტებისთვის, თუმცა აუცილებლად ფრთხილად იყავით პერსონალურ ნივთებთან. ხალხმრავალ ადგილებში შეიძლება მცირე ჯიბის ქურდობებს შეესწროთ.

გაზაფხული და შემოდგომა საუკეთესოა ვენეციაში სამოგზაუროდ. ამ დროს ტემპერატურა იდეალურია და ქალაქს უფრო კომფორტულად დაათვალიერებთ.

VCE – ვენეციის აეროპორტი ქალაქიდან სულ რაღაც 7 კილომეტრში მდებარეობს.

საქართველოდან ვენეციის მიმართულებით ფრენები შეგიძლიათ ნახოთ საქართველოს სამივე აეროპორტიდან მხოლოდ გადაჯდომით. თუმცა, ვინ შეუშინდება გადაჯდომისას მცირეხნიან პაუზას ვენეციაში სამოგზაუროდ?!

თბილისიდან  შემოგთავაზებთ შემდეგი ავიაკომპანიები ფრენებს: Aegean Airlines, Pegasus, Lot, Turkish Airlines და სხვა. მათგან Pegasus ქუთაისიდანაც დაფრინავს, Turkish Airlines კი ბათუმიდანაც ასრულებს რეისებს.

გირჩევდით, რომ ავიაბილეთები დაჯავშნოთ 1 ან 2 თვით ადრე. ასევე, უმჯობესია ფრენები შეიძინოთ კვირის დღეებში და არა შაბათ-კვირას. საუკეთესო ფასების მისაღებად კი უნდა გამოიყენოთ საძიებო პლატფორმა Avia.ge .