ერევანი – გზამკვლევი მოგზაურობის დაგეგმვისთვის

კენტრონის უბანი (Kentron) – ამ უბანში დარჩენა რეკომენდებულია ერევანში პირველად მოგზაურებისათვის. იგი ქალაქის ცენტრში მდებარეობს, ერევნის მთავარ ღირსშესანიშნაობებთან ახლოს. აქ ნახავთ ქალაქის ოპერის შენობას, რესპუბლიკის მოედანს, თანამედროვე ხელოვნების მუზეუმს, ცნობილ მეჩეთებსა და სხვა.

წიწერნაკაბერდი (Tsitsernakaberd) – ეს უბანი საუკეთესოა ისტორიის მოყვარულებისათვის. აქ სხვადასხვა ეპოქის მონუმენტებს ნახავთ. უბანში შესაძლებელია ბიუჯეტური სასტუმროების პოვნა.

არაბკირი (Arabkir) – არაბკირი ქალაქის ცენტრთან ახლოს მდებარე უბანია. თანაც, აქ ბევრი მწვანე სივრცე დაგხვდებათ დასვენებისა და განტვირთვისათვის. უბანში მრავლადაა მაღაზიები და კაფეები.

ერევნის კასკადი (Yerevan Cascade Complex) – ეს უბანი ტურისტებითა და ადგილობრივებით არის დასახლებული. კასკადი გიგანტური კიბეა, რომელიც ბაღებითაა გარშემორტყმული. კასკადის ტერიტორიაზე ნახავთ კაფე-რესტორნებსა და მაღაზიებსაც.

ერებუნის ციხე (Erebuni Fortress) – ერებუნის ციხის გარშემო ტერიტორიაზე ძალიან ბიუჯეტურად შეძლებთ დასვენებას. იგი შედარებით გარეუბანში მდებარეობს. თავად ციხე ძველი წელთაღრიცხვით მე-8 საუკუნიდან იღებს სათავეს.

ერევნის რესპუბლიკის მოედანი კულტურათა თავშეყრის ადგილია. იგი უძველესი დროიდან ქალაქისთვის მნიშვნელოვან კულტურულ ფუნქციას ასრულებს. აქ სხვადასხვა ღონისძიებები და სანახაობები იმართება. თუ გსურთ, სომხურ კულტურასა და ისტორიას უკეთ გაეცნოთ, გირჩევდით ამ მოედანზე გასეირნებას.

არარატის მუზეუმი ძველი მსოფლიოს ისტორიის შემომნახველი ერთ-ერთი ყველაზე მნიშვნელოვანი შენობაა. თუ გსურთ უძველესი კულტურების შესახებ მეტი შეიტყოთ, აუცილებლად ეწვიეთ მას.

ეს მუზეუმი არამ ხაჩატურიანის, მე-20 საუკუნის უმნიშვნელოვანესი კომპოზიტორის, პირად ნივთებს, ნამუშევრებსა და წერილებს ინახავს. ხაჩატურიანი UNESCO-მ მსოფლიოს ერთ-ერთ წამყვან კომპოზიტორად აღიარა.

ეს მონუმენტი 1915 წლის სომხური გენოციდის ხსოვნას განასახიერებს. ოსმალეთის იმპერიამ 1.5 მილიონი სომეხი მოკლა. 12 წრეზე მდგარი სვეტი ეძღვნება გენოციდის დროს დაღუპული უდანაშაულო ადამიანების ხსოვნას.

კათოღიკეს ეკლესია სომხეთის ერთ-ერთი უძველესი ბაზილიკის ტიპის ტაძარია. იგი მე-17 საუკუნეში აშენდა და ყველაზე მაღალი ეკლესიაა ერევანში.

მატენადარანი – მესროპ მაშტოცის სახელობის უძველესი ხელნაწერების ინსტიტუტი, რომელიც ერთდროულად მუზეუმიცაა და კვლევითი ცენტრიც. აქ უამრავი უძველესი ხელნაწერია თავმოყრილი. გარდა ფუნქციური დატვირთვისა, ეს შენობა თავისი ექსტერიერით, ულამაზესი არქიტექტურული სტილითაც მოგნუსხავთ.

კასკადი ერთ-ერთი ყველაზე გამორჩეული მონუმენტია პოსტ-საბჭოთა ტერიტორიაზე. კასკადზე ასვლა შეგიძლიათ კიბეებით ან ესკალატორით. აქედან არარატის მთასა და მთელ ერევანს გადმოხედავთ.

დავით სასუნელი სომხური ეპოსის გმირია, რომელიც თავისუფლებისათვის იბრძოდა. მისი ცხენზე ამხედრებული ქანდაკება სომხეთის ერთ-ერთი ყველაზე მნიშვნელოვანი და სიმბოლური ღირსშესანიშნაობაა.

გენოციდის მუზეუმი მემორიალთან ახლოს მდებარეობს. იგი ტრაგიკული მოვლენიდან 80 წლის თავზე გაიხსნა. მუზეუმის მეორე სართულზე 3 განყოფილება დაგხვდებათ, რომელიც ინახავს დოკუმენტებს, წიგნებსა და ფოტოებს სომხური გენოციდის შესახებ.

თავდაპირველად ეკლესია მე-17 საუკუნეში აშენდა, თუმცა დიდი მიწისძვრის შედეგად დაზიანდა. იგი რეკონსტრუირდა მე-20 საუკუნეში თანამედროვე არქიტექტურული სტილით. მთელი მისი ფასადი ნარინჯისფერია.

Gata Tavern – თუ გსურთ გასინჯოთ ერევნის პოპულარული კერძები და უგემრიელესი ტკბილეული, აუცილებლად ეწვიეთ ამ ტავერნას. აქ შეგიძლიათ სომხური ქადა დააგემოვნოთ. თანაც, ტავერნა სომხური სტუმართმოყვარეობის სანიმუშო დონით დაიკვეხნის.

Sherep Restaurant – ეს რესტორანი დაიკვეხნის მთავარი კერძების მრავალფეროვნებით. აქ შეგიძლიათ სადილობისას ან ვახშმობისას შეიაროთ და გასინჯოთ ადგილობრივი სუფი ლავაშთან ერთად.

Lavash Restaurant – ეს რესტორანი ერევანში ყველაზე პოპულარულია. აქ ძალიან მეგობრული გარემო, მშვიდი ატმოსფერო და, რაც მთავარია, ტრადიციული სომხური კერძების მთელი მენიუ დაგხვდებათ.

ერევანი ცნობილია ტკბილეულის სიყვარულით. აქაური ქადა და სხვა დესერტები ტურისტების საყვარელი სასუსნავია.

Seasons Sweetland – ეს ერთ-ერთი პოპულარული ადგილია ტკბილეულისათვის ერევანში. აქ ნახავთ ცნობილ მაკარუნებსა და სხვა დესერტებს.

Sweet Coast – ამ კაფეში ტკბილეულის დიდი არჩევანი დაგხვდებათ. შემოგთავაზებენ სხვა კერძებსაც.

Yerevan Bakery – ეს ცნობილი საცხობი კი ნამდვილი სამოთხეა ტკბილეულისა და პურ-ფუნთუშეულის მოყვარულთათვის.

Panda Rooftop – ამ რესტორნიდან ქალაქის მთელი ხედი გადაგეშლებათ თვალწინ. გირჩევთ, აქ ვახშამი დაგეგმოთ. თანაც, რესტორანი მრავალფეროვან მენიუს შემოგთავაზებთ, ადგილობრივი თუ საერთაშორისოდ ცნობილი კერძების ჩამონათვალით.

L’ÉTÉ Cafe & Veranda – მშვიდი სადილობისათვის აუცილებლად უნდა ეწვიოთ ამ კაფეს. აქ შეგეძლებათ მსოფლიოში ცნობილი კერძები დააგემოვნოთ ერევნის ულამაზესი ხედის თანხლებით.

Park Bridge Restaurant & Music Hub – ამ რესტორანში კი ცოცხალი მუსიკის თანხლებით შეძლებთ პოპულარული კერძების მირთმევას. საინტერესო გამოცდილების მისაღებად ნამდვილად ღირს აქ ვიზიტი.

Yerevan Mall – ეს ერევნის ყველაზე ცნობილი საშოპინგო ცენტრია. აქ დაგხვდებათ 200-ზე მეტი მაღაზია, კინოთეატრი, გასართობი ცენტრები და სხვა.

Dalma Garden Mall – ერთ-ერთი ყველაზე ცნობილი საშოპინგო ცენტრი ერევანში. აქ დაგხვდებათ ტანსაცმელი, აქსესუარები, კოსმეტიკა და სხვა უამრავი ნივთი, მათ შორის ცნობილი ბრენდები.

Tashir Street Shopping Center – ეს საშოპინგო ცენტრი მეტროსადგურთან ახლოს მდებარეობს. აქ ნახავთ როგორც პოპულარულ ბრენდებს, ასევე ხელნაკეთ აქსესუარებსაც.

ადგილობრივ მოსახლეობას რამდენიმე პოპულარული ადგილი აქვს სხვადასხვა ტიპის ნივთების შესაძენად. გიზიარებთ მათ გამოცდილებას:

• Homeland Handycrafts – ამ მაღაზიაში ხელნაკეთ ნივთებსა და სუვენირებს შეიძენთ. თუ ორიგინალური საჩუქრის შერჩევა გსურთ, აუცილებლად ეწვიეთ აქაურობას
• Ardēan Yerevan – აქ ნახავთ ბევრნაირ ნივთს – ქსოვილებს, ხელოვნების ნიმუშებსა თუ ტექნოლოგიურ მოწყობილობებს
• Noy Wine Factory Yerevan – აქ კი დააგემოვნებთ ადგილობრივ ღვინოს. შენობა ძველი ციხესიმაგრის ადგილას მდებარეობს.

მეტრო ერევანში გადაადგილებისათვის მარტივი და სწრაფი საშუალებაა. ქალაქს მეტროს ორი ხაზი აქვს და მარტივად შეძლებთ გზის გაგნებას. თანაც, მეტრო საკმაოდ იაფია, თითო მგზავრობა 150 AMD (0.40 USD) ღირს.

ერევანში მანქანის ქირაობაც ძალიან იაფი დაგიჯდებათ – დღეში 25$ -ად შეგიძლიათ იქირავოთ მანქანა და შემოიაროთ არარატის მთის შემოგარენი. შეგიძლიათ ეწვიოთ შემდეგ საიტს: https://treaties.un.org/pages/ViewDetailsIII.aspx?src=TREATY&mtdsg_no=XI-B-19&chapter=11

ერევანში შეგიძლიათ ველოსიპედით ან ელექტრო-სკუტერით ისეირნოთ. სკუტერების ოფიციალური სერვისები შემდეგია:

• RIDE
• JET
• BusyFly

ევროპის ქალაქებისაგან განსხვავებით, ერევანში ტაქსითი სიარული საკმაოდ იაფია. გაითვალისწინეთ, რომ ოფიციალური სერვისებით ისარგებლოთ. მაგალითად:

• GG application
• Yandex Taxi

ერევანში ფეხით გადაადგილება ძალიან გაგიმარტივდებათ. თანაც, ასე უკეთ შეძლებთ ქალაქის ღირსშესანიშნაობების დათვალიერებას, განსაკუთრებით ქალაქის მთავარ მოედანზე.

გამარჯვების პარკი (Victory Park) – არა მხოლოდ რეკრეაციული ზონა, არამედ ისტორიული და კულტურული კონტექსტითაც მნიშვნელოვანია. პარკს სახელი დაერქვა დიდ სამამულო ომად წოდებული მეორე მსოფლიო ომის პერიოდის შემდეგ. პარკში იოსებ სტალინის ძეგლიც დგას.

შეყვარებულების პარკი (Lovers Park) – ერევნის ერთ-ერთი ყველაზე ცნობილი პარკია. აქ შეგიძლიათ მყუდრო და რომანტიკული გასეირნება მოიწყოთ.

ერევნის ზოოპარკი (Yerevan Zoo) – ერევნის ზოოპარკი ყოველდღე უმასპინძლებს ტურისტებს. აქ 2700 ცხოველი დაგხვდებათ. აქაურობა განსაკუთრებით უყვართ ბავშვებს.

ვარდანიანის პარკი (Vardanyan’s Park) – ერევნის უდიდესი საჯარო პარკი. იგი ქველმოქმედი ვარდანიანების მიერ ერევნისათვის გახსნილი პარკია. აქ მყუდრო გარემოში შეძლებთ დასვენებას.

ჯრვეჟის პარკი (Jrvezh Forest Park)  – ეს პარკი ცენტრიდან დაახლოებით 20 კილომეტრის მოშორებით მდებარეობს. ამ პარკის მონახულება ნამდვილად ღირს, რადგან აქედან არარატის მთის ხედებს დაინახავთ.

ინგლისური ბაღი (English Garden) – ეს ერთ-ერთი უძველესი ბაღია ერევანში. იგი 1850 წელს გაიხსნა მნახველებისათვის. აქ დაგხვდებათ ხეების რიგები, შადრევნები და სხვადასხვა ისტორიული ძეგლები.

2-3 დღე მაინც გათვალეთ ერევანში სამოგზაუროდ, რათა შეძლოთ ქალაქის მთავარი ღირსშესანიშნაობების კარგად დათვალიერება.

პირველ რიგში, ფრენისათვის საჭირო ნივთების წაღება არ დაგავიწყდეთ, იქნება ეს დოკუმენტები, პასპორტი თუ კომფორტული ბალიში. ასევე, შეამოწმეთ ყველა გაჯეტი და დამტენი. კომფორტული მოგზაურობისათვის წაიღეთ სპორტული ფეხსაცმელი და კომფორტული ტანსაცმელი. ფოტოების მოყვარულებმა წაიღეთ ფოტოაპარატიც, რადგან აქ ულამაზეს ბუნებასა და ღირსშესანიშნაობებს ნახავთ.

ერევანი ერთ-ერთი ყველაზე ძველი ქალაქია. აქ შეგიძლიათ ეწვიოთ ისტორიულ მუზეუმებსა თუ ტაძრებს. თანაც, ქალაქი არქიტექტურულადაც ულამაზესია და აუცილებლად შეგაყვარებთ თავს მშვიდი ქუჩებითა და უბნებით.

ერევანი ერთ-ერთი ყველაზე იაფი ქალაქია სამოგზაუროდ. აქ საკმაოდ ბიუჯეტურად შეძლებთ დასვენებას, ღირსშესანიშნაობების მონახულებას, გადაადგილებასა თუ კვებას.

ერევანი ერთ-ერთ ყველაზე უსაფრთხო ადგილად ითვლება სამოგზაუროდ.

შემოდგომა საუკეთესო სეზონია ერევანში სამოგზაუროდ. ამ დროს ქალაქში იდეალური ტემპერატურაა, თანაც ბაზრობები ამ დროს ადგილობრივი პროდუქტითაა სავსე და მათ დაგემოვნებასაც შეძლებთ.

EVN – ზვართნოცის აეროპორტი ერევნის ცენტრიდან 12 კილომეტრში მდებარეობს.

ერევანში გაფრენას პირდაპირი ავიარეისებით შეძლებთ თბილისის საერთაშორისო აეროპორტიდან.

თბილისიდან ერევნის მიმართულებით ფრენებს შემოგთავაზებთ შემდეგი ავიაკომპანიების შესრულებით: Georgian Airways და FlyOne .

გირჩევდით, რომ ავიაბილეთები დაჯავშნოთ 1 ან 2 თვით ადრე. ასევე, უმჯობესია ფრენები შეიძინოთ კვირის დღეებში და არა შაბათ-კვირას. ყველაზე იაფი ფასის მისაღებად კი ეწვიეთ საძიებო პლატფორმა Avia.ge -ს.