TAV Georgia-ს ინვესტიციით, თბილისის საერთაშორისო აეროპორტის აეროდრომზე ფრენების სახანძრო უზრუნველყოფის სამსახურის შენობა 40%-ით გაფართოვდა.
გაფართოებული ინფრასტრუქტურა და მულტიფუნქციური სივრცე
განახლებული ნაგებობა $1000 მ^2$ ფართობს მოიცავს. ამ ტერიტორიაზე, სახანძრო უსაფრთხოების სამსახურთან ერთად, განთავსებულია სამეთვალყურეო კოშკურა, საავარიო ოპერატიული ცენტრი, სასწავლო ცენტრი, საწყობი, ოფისები და სხვა საჭირო სივრცეები.
ICAO-ს მე-9 კატეგორია და პერსონალის საჭიროებები
აეროდრომის ტერიტორიაზე არსებული შენობის რეკონსტრუქციის საჭიროება მას შემდეგ გაჩნდა, რაც თბილისის საერთაშორისო აეროპორტის ფრენების სახანძრო უზრუნველყოფის სამსახურს ICAO-ს სტანდარტით მე-9 კატეგორია მიენიჭა. ამ ცვლილების შედეგად გაიზარდა მეხანძრე-მაშველების რაოდენობა და დადგა მათთვის დამატებითი კომფორტისა და ხარისხიანი სამუშაო პირობების შექმნის აუცილებლობა.
აღსანიშნავია, რომ ICAO (საერთაშორისო სამოქალაქო ავიაციის ორგანიზაცია) აეროდრომების სახანძრო-სამაშველო მზადყოფნას სულ 10 კატეგორიით აფასებს. ეს კატეგორიები იმ საჰაერო ხომალდების ზომითა და ტიპებით განისაზღვრება, რომლებსაც აეროპორტი ემსახურება.
მაღალი კლასის ხომალდების მომსახურება და ავტოპარკის განახლება
მე-9 კატეგორია, რომელსაც თბილისის საერთაშორისო აეროპორტის ფრენების სახანძრო უზრუნველყოფის სამსახური აკმაყოფილებს, მაღალი კლასის საჰაერო ხომალდებს მოიცავს (B777, B787, A350 და მსგავსი ტიპები). ეს კატეგორია, მეხანძრე-მაშველების რაოდენობის გაზრდასთან ერთად, მოითხოვს მაღალი ტევადობის სახანძრო მანქანებს, უმოკლეს დროში რეაგირების შესაძლებლობას, დამატებით ინფრასტრუქტურას, ტექნიკასა და ოპერატიულ სივრცეს.
TAV Georgia-მ ბოლო ერთი წლის განმავლობაში ეს მოთხოვნები ეტაპობრივად უზრუნველჰყო. მათ შორის, განაახლა ფრენების სახანძრო უზრუნველყოფის სამსახურის ავტოპარკი და შეიძინა სრულიად ახალი, სწრაფი რეაგირების, სახანძრო უსაფრთხოების საერთაშორისო სტანდარტებით აღჭურვილი სახანძრო-სამაშველო მანქანა. ამ ეტაპისთვის აღნიშნული სამსახური დაკომპლექტებულია სათანადოდ აღჭურვილი 4 ერთეული ძირითადი და 3 ერთეული დამხმარე სახანძრო-სამაშველო ავტომობილით.
Avia.ge – 8 წელი თქვენს სამსახურში! საიმედო პარტნიორი მოგზაურობაში.
დაგვირეკე: 551 907 907
