პარიზის ორსეის მუზეუმი ლუვრის შემდეგ ყველაზე მეტად მონახულებადია. მას ყოველწლიურად მილიონობით სტუმარი ჰყავს. გასაკვირი არცაა. ვინ შეძლებს, პარიზში ყოფნისას გაუძლოს ცდუნებას, რომ პარიზული ხელოვნების ნიმუშები, ნახატები, ავეჯი, სკულპტურები თუ ფოტოები ნახოს?!
ორსეის მუზეუმი 1986 წელს გაიხსნა და მას შემდეგ ორანჟერისა და ლუვრთან ერთად ფრანგულ ტრიადაში შედის. აქ ძირითადად მე-19 და მე-20 საუკუნის ფრანგულ ხელოვნებას ნახავთ. მუზეუმი რკინიგზის შენობაში მდებარეობს, რაც მის ატმოსფეროს კიდევ უფრო მაგიურსა და დაუჯერებელს ხდის. ფაქტობრივად, მუზეუმი, მთელი თავისი ხიბლით, საშუალებას გაძლევთ იმპრესიონისტულ და პოსტ-იმპრესიონისტულ პარიზში იმოგზაუროთ. ორსეის მუზეუმში ნახავთ ისეთი ცნობილი მხატვრების ნამუშევრებს, როგორებიც არიან კლოდ მონე, გოგენი, ვან გოგი, რენუარი, ედუარდ მანე და სხვა. მდინარე სენას მარცხენა სანაპიროზე მდებარე ეს საოცარი შენობა ხელოვნების ნამდვილი სახლია. აქ სტუმრობა არა მხოლოდ ხელოვანებს, არამედ უბრალოდ ესთეტიკისა და პარიზული კულტურის მოყვარულებს ძალიან მოეწონებათ. სტატიაში წაიკითხავთ საინტერესო დეტალებსა და ფაქტებს ორსეის მუზეუმის შესახებ.
