ხარვეზი ახალ პასპორტებში: იუსტიციის სახლი მუშაობას საგანგებო რეჟიმში განაგრძობს
თბილისის იუსტიციის სახლში სამუშაო საათების დასრულების შემდეგაც ხალხმრავლობაა. მიზეზი სერვისების განვითარების სააგენტოს მიერ დაშვებული გაურკვეველი ხარვეზია — მოქალაქეებს, რომლებმაც განახლებული პასპორტები თებერვლის დასაწყისში აიღეს, უწყება დოკუმენტების სასწრაფო წესით შეცვლას სთხოვს.
რა ხდება იუსტიციის სახლში?
ამ დროისთვის შენობაში 20-მდე ადამიანი დოკუმენტის ხელახლა დაბეჭდვას ელოდება. მოქალაქეების თქმით, მათ სააგენტოდან დაუკავშირდნენ და აცნობეს, რომ პასპორტები „შესაცვლელია“, თუმცა კონკრეტული მიზეზი — თუ რა წუნი აქვს დოკუმენტს — არ განუმარტავთ.
მასშტაბი: სააგენტოს წარმომადგენლებმა ერთ-ერთ მოქალაქესთან საუბრისას აღნიშნეს, რომ პრობლემა 4 და 5 თებერვალს გაცემულ ყველა დოკუმენტს ეხება.
გადაუდებელი შემთხვევები: მათ შორის, ვინც პასპორტებს სასწრაფოდ ცვლის, არიან ადამიანები, რომლებსაც ფრენა ხვალ ან ზეგ აქვთ დაგეგმილი.
ფინანსური მხარე: მოქალაქეებს, რომლებსაც პასპორტის ხელახლა დამზადება მოუხდათ, დამატებითი საფასური არ გადაუხდიათ.
სააგენტოს პოზიცია: „ხარვეზი არ ყოფილა“
მიუხედავად იმისა, რომ ათეულობით მოქალაქეს დოკუმენტს სასწრაფოდ უცვლიან, სერვისების განვითარების სააგენტო „რადიო თავისუფლებასთან“ ხარვეზის არსებობას უარყოფს. უწყების განმარტებით, ეს „სტანდარტული მონიტორინგის“ ნაწილია:
„იმ შემთხვევაში, თუ პროცესში ან შემდგომ ეტაპზე გამოიკვეთება რაიმე სახის საჭიროება, სააგენტო უკავშირდება ინდივიდუალურად თითოეულ მოქალაქეს… რათა უზრუნველყოფილი იყოს დოკუმენტების სიზუსტე და უსაფრთხოება.“
