პარიზის სენ-შაპელის ტაძარი ერთ-ერთი ყველაზე ლამაზი შენობაა, რომელსაც საფრანგეთში მოგზაურობისას ნახავთ. იგი შუასაუკუნეების პერიოდში, მე-13 საუკუნეში აშენდა. მისი მშენებლობა დაკვეთილი იყო ფრანგი მეფის ლუი მე-9 წმინდას მიერ. მისი მიზანი კი იმაში მდგომარეობდა, რომ ქრისტიანული რელიკვიებისათვის წმინდა ტაძარი აეგო. შეიძლება ითქვას, რომ მეფემ თავის მიზანს მიაღწია, თანაც ყველაზე ლამაზი და სრულყოფილი ფორმით.
სენ შაპელი ერთ-ერთია იმ შენობათაგან, რომელიც შუასაუკუნეების ეპოქიდან შემორჩა მსოფლიოს. იგი დიდებულ გოთიკურ ნაგებობას წარმოადგენს. ჯერ მხოლოდ მისი ულამაზესი შუშის მოხატული ფანჯრები რად კმარა?! ტაძრის თაღიც ქრისტიანულ სიმბოლურ სტილს იმეორებს. მისი გადაჯაჭვული თაღები, ლამაზი სვეტები, ტაძრის შიგნით დასადგურებული მყუდრო ატმოსფერო და ფერადი შუშებისაგან ასხლეტილი სინათლე ნებისმიერ მნახველს გააოცებს. სენ შაპელის ნახვა ბევრი ტურისტის ოცნებაა. იგი ნამდვილად იმსახურებს მოწინავე ადგილს ფრანგულ ღირსშესანიშნაობებში. ამ ბლოგში გაგაცნობთ ტაძრის შესახებ მნიშვნელოვან ინფორმაციას და გაგიმარტივებთ აქ მოხვედრას.
