იცოდით, რომ ეიფელის კოშკი დაახლოებით 81-სართულიანი შენობის სიმაღლისაა? ეს გრანდიოზული კონსტრუქცია პარიზის მთავარი ღირსშესანიშნაობა და მსოფლიოში ცნობილი მონუმენტია. იგი მარსის ველის გასწვრივ მდებარეობს, შესაბამისად ეიფელამდე მისვლა ცალკე თავგადასავალია, თუ ამ უმშვენიერეს პარკშიც გაივლით.
ეიფელი მე-19 საუკუნეში აშენდა და სიმბოლურად მიეძღვნა ფრანგული რევოლუციის ასი წლისთავს. “რკინის ქალბატონი”, როგორც ამას ადგილობრივები ეძახიან, სპეციალურად აშენდა მსგავსი არქიტექტურული სტილით, რათა ქარისთვის მარტივად გაეძლო, დიდი სიმაღლიდან გამომდინარე. იგი საფრანგეთის მეორე უმაღლესი შენობაა.
ეიფელის მშენებლობის პროცესში ფრანგული პრესა გადაჭედილი იყო მისი კრიტიკით. დასრულების შემდეგ კი, პარიზი ერთხმად თანხმდებოდა ეიფელის გრანდიოზულობაზე და დღემდე საფრანგეთის სიამაყედ და მსოფლიოს ცნობილ ღირსშესანიშნაობად რჩება.
ეიფელის კოშკი საკმაოდ ახლებური ტექნიკებით, მრავალი პროფესიონალის ჩართულობით შეიქმნა. მისი რევოლუციურობა არქიტექტურული სტილის უბრალოებასა და, შესაბამისად, გენიალურობაში მდგომარეობს. იგი მეტალის გისოსებიანი კოშკია, რომლის სიმაღლიდანაც მთელი პარიზი ხელის გულზე იშლება. ეიფელის კოშკის ტურის შემთხვევაში შეძლებთ მისი სიმაღლიდან გადმოხედვას და აქ განთავსებულ რესტორანშიც შეგიძლიათ ისადილოთ. როგორც ჩანაფიქრშივე იყო დათქმული, მას უნდა გამოეხატა ფრანგული სული და დღემდე ყველაზე პარიზულ, პომპეზურ ნაგებობადაა აღქმული. ადამიანები მსოფლიოს სხვადასხვა წერტილიდან პარიზში ეიფელის სანახავად ჩამოდიან. კოშკი განსაკუთრებით ლამაზია ღამით, როცა განათებების ბურუსშია გახვეული.
