თბილისისა და ბათუმის საერთაშორისო აეროპორტების მმართველმა კომპანია TAV Georgia-მ (ტავ ჯორჯია) სამოქალაქო ავიაციის დღესთან დაკავშირებით თბილისის საავიაციო უნივერსიტეტის სტუდენტები დააჯილდოვა. მათ გადაეცათ სასწავლო სტიპენდიები, რომლითაც საავიაციო უნივერსიტეტში სწავლა დაუფინანსდებათ.
წელს, აკადემიური მოსწრებისა და სოციალური მდგომარეობის გათვალისწინებით, შეირჩა 5 სტუდენტი, რომლებიც უნივერსიტეტში ეუფლებიან შემდეგ სპეციალობებს:
- საჰაერო მოძრაობის მართვის სისტემების ტექნიკური ექსპლუატაცია
- საფრენი აპარატების დაპროექტება
- საჰაერო ტრანსპორტის მენეჯმენტი
თანამშრომლობა და პრაქტიკული უნარების განვითარება
გარდა სტიპენდიებისა, რაც სტუდენტებისთვის მნიშვნელოვანი ფინანსური შეღავათია, TAV Georgia და საქართველოს საავიაციო უნივერსიტეტი შესაბამისი მემორანდუმის ფარგლებში უკვე წლებია ერთობლივად მუშაობენ სტუდენტთა პრაქტიკული უნარების განვითარებასა და საავიაციო სფეროში კვალიფიციური კადრების მომზადებაზე.
ეს თანამშრომლობა გულისხმობს დამამთავრებელი კურსის სტუდენტებისთვის აეროპორტის მგზავრთა მომსახურებისა და ფრენების ოპერირების სამსახურებში სამუშაო პრაქტიკის შეთავაზებას, რაც სტუდენტებს სასწავლო კრედიტებში ეთვლებათ. შესაბამისი სტაჟირების პროგრამები ეტაპობრივად ცხადდება. წარმატებული სტაჟირების შემდეგ, TAV Georgia წარჩინებულ სტუდენტებს დასაქმების შესაძლებლობებს სთავაზობს.
20 წლიანი წვლილი კადრების განვითარებაში
TAV Georgia საქართველოში უკვე 20 წელია ოპერირებს და ამ პერიოდის განმავლობაში ააშენა და განავითარა ქვეყნის ორი საერთაშორისო აეროპორტი – თბილისსა და ბათუმში. ამ 20 წლის განმავლობაში კომპანია დიდ რესურსს დებდა კადრების განვითარებაში.
დღეისთვის TAV Georgia-ს 1900-ზე მეტი დასაქმებული ჰყავს. საავიაციო სფეროს სტაჟიანი და ღირებული კადრების შენარჩუნების გარდა, კომპანია დიდ რესურსს დებს ასევე იმ ახალგაზრდების ხელშეწყობაში, რომლებიც საკუთარ მომავალს საავიაციო სფეროში ხედავენ.
Avia.ge – 8 წელი თქვენს სამსახურში! საიმედო პარტნიორი მოგზაურობაში.
დაგვირეკე: 551 907 907