ბათუმის ალექსანდრე ქართველის სახელობის საერთაშორისო აეროპორტი მდებარეობს ბათუმის სამხრეთ ნაწილში. ასაფრენ-დასაფრენი ზოლი ჭოროხის მარჯვენა სანაპიროზეა წარმოდგენილი.
აეროპორტი 2007 წლის 26 მაისს, საქართველოს დამოუკიდებლობის დღეს გაიხსნა და ის შ.პ.ს. TAV Urban Georgia-ს მმართველობაში იმყოფება. 2021 წლის მარტში მას ახალი ტერმინალი დაემატა, რის გამოც დღეისთვის მას მილიონზე მეტი მგზავრის მომსახურება შეუძლია.
ბათუმის აეროპორტიდან საერთაშორისო ფრენები ხორციელდება ისეთ მიმართულებებზე, როგორიცაა:
- სტამბოლი
- ბაქო
- თელ-ავივი
- ვარშავა
- ასტანა
- ერევანი
- ელ ქუვეითი
- თეირანი
- მინსკი
- ერ რიადი
- ამანი
- ბეირუთი
- ხარკოვი
- კიევის რამდენიმე ქალაქის მიმართულებით.
შესაძლებელია ადგილობრივი რეისებით მგზავრობაც, რომელიც თბილისის მიმართულებით ხორციელდება. თუ კი ბათუმიდან თბილისში ან თბილისიდან ბათუმში დროის მოკლე მონაკვეთში გინდათ მოხვედრა, მაშინ ეს საუკეთესო ვარიანტია.
რომელი ავიაკომპანიები ასრულებენ ფრენას ბათუმის აეროპორტიდან?
ბათუმის საერთაშორისო აეროპორტში ფრენებს ათამდე ავიაკომპანია ასრულებს და მათი გარკვეული ნაწილი, მხოლოდ სეზონზე ემსახურება მგზავრებს. ავიკომპანიების ჩამონათვალში შეხვდებით Air Arabia-ს, Belavia-ს, რომელსაც პირდაპირი რეისები აქვს ბელარუსიის ქალაქების მიმართულებით, Turkish Airlines , ჯორჯიან აირვეის, Arkia Airlines, El Al და ა.შ.
2016 წლიდან ბათუმის საერთაშორისო აეროპორტს დაემატა რამდენიმე ახალი ჩარტერული რეისი და მგზავრების რაოდენობამ 300 000 -ს გადააჭარბა.
ტრანსპორტირება ბათუმის აეროპორტში
ბათუმის აეროპორტი უზრუნველყობს ტაქსითა და ავტობუსით მომსახურებას. ასევე შესაძლებელია ავტოსადგომით სარგებლობაც.
ტაქსის სადგომის ნახვა შესაძლებელია აეროპორტიდან გამოსვლისთანავე, ქალაქის ცენტრში მოსახვედრად კი დაახლოებით 15 წუთია საჭირო.
ავტობუსის გაჩერება მდებარეობს ტერმინალის წინ. ქალაქის ცენტრამდე მგზავრობას დაახლოებით 20 წუთი სჭირდება.
რაც შეეხება ავტოსადგომს, რომელიც სრულიად არის აღჭურვილი მომხმარებლის მოთხოვნების შესაბამისად, 100-მდე ავტომანქანაზეა გათვლილი. გასათვალისწინებელია, რომ ის ფასიანია და პარკირების საფასური 1 სთ – 2 ლარია, 2 სთ – 4 ლარი, 6სთ – 5 ლარი, 12 სთ – 7 ლარი, ხოლო 24 სთ – 10 ლარი.
კვება და მაღაზიები ბათუმის აეროპორტში
მგზავრებს შესაძლებლობა აქვთ ესტუმრონ აეროპორტის კაფეს – “კანტინი” , სადაც მრავალფეროვან ადგილობრივ კერძებსა და სასმელს დააგემოვნებენ. კაფე მდებარეობს გამგზავრების დარბაზში.
რაც შეეხება სავაჭრო ობიექტებს, აქ შესაძლებელია ქართული ტრადიციული ხელნაკეთი ნივთების, აქსესუარების და სუვენირების შეძენა. ასევე, შეხვდებით Duty Free-ს, რომელიც უზრუნველყოფს მსოფლიოში ცნობილი ბრენდების მრავალფეროვნებას, სადაც მგზავრებს საშუალება ეძლებათ შეიძინონ სუნამოები, კოსმეტიკა, ტკბილეული და სხვ. მაღაზია მდებარეობს საპასპორტო კონტროლის უკანა მხარეს და მუშაობს 24 საათის განმავლობაში.
აეროპორტში ასევე შესაძლებელია ისარგებლოთ საქართველოს ბანკისა და ბანკ რესპუბლიკას სერვისცენტრებით, რომლებიც განთავსებულია გამგზავრების დარბაზში.
ბათუმის საერთაშორისო აეროპორტში კითხვების ან გზამკვლევის მოძიების მიზნით შესაძლებელია, ცნობათა ბიუროს მიმართოთ, რომელიც გამგზავრების დარბაზში მდებარეობს და 24 საათის განმავლობაში ფუნქციონირებს. ინფორმაციის მიღება შესაძლებელია როგორც ადგილზე, ასევე ონლაინ რეჟიმში – ტელეფონით, დღე-ღამის ნებისმიერ მონაკვეთში.
აეროპორტს ასევე სამედიცინო პუნქტიც ემსახურება. ჯანმრთელობისა და უსაფრთხოების უზრუნველყოფა ყველაზე პრიორიტეტულ საკითხს წარმოადგენს და ამისათვის მნიშვნელოვან ღონისძიებებსაც ატარებს.