ახალი და განახლებული ავიარეისები საქართველოს საავიაციო ბაზარზე 2021 ივლისი

საქართველოს საავიაციო ბაზარზე მუდმივად მატებაა. ზაფხულის სანავიგაციო სეზონის დადგომასთან ერთად ფრენებს ანახლებენ ავიაკომპანიები, რომლებიც საქართველოს აეროპორტებში პანდემიამდე ოპერირებდნენ და ამასთანავე, შემოდიან ახალი ავიაკომპანიები ახალი მიმართულებებით.

ამ სტატიაში ერთობლივად გაგაცნობთ ყველა იმ ავიაკომპანიას, რომელიც ახალი თუ განახლებულ ავიარეისებით საქართველოს აეროპორტებს შემოუერთდა.

Gulf Air

ბაჰრეინის სახელმწიფოს ავიაკომპანია Gulf Air-ი საქართველოში 2017 წლიდან ოპერირებდა, თუმცა პანდემიის გამო, როგორც სხვა ავიაკომპანიებმა, ფრენები შეწყვიტა. 15 ივლისიდან კი, ავიაკომპანიამ აღადგინა ფრენები ბაჰრეინისა და საქართველოს დედაქალაქებს შორის.

Gulf Air-ი მანამა – თბილისი – მანამის საჰაერო ხაზზე ფრენებს ყოველ ორშაბათს, სამშაბათს, ხუთშაბათს და შაბათს შეასრულებს.

Myway Airlines

ქართული ავიაკომპანია Myway Airlines-ი ორ ახალ მიმართულებას გვთავაზობს. ავიაკომპანიამ 6 ივლისს თბილისსა და ერევანს შორის დაიწყო ოპერირებადა ფრენებს კვირაში ორი სიხშირით, ყოველ სამშაბათს და შაბათს ასრულებს.

რაც შეეხება მეორე მიმართულებას, ავიაკომპანიამ საუდის არაბეთის მიმართულებით დაიწყო ოპერირება. Myway Airlines-მა 13 ივლისიდან დაიწყო ფრენების შესრულება თბილისი – დამამი – თბილისის საჰაერო ხაზზე. რეისები კვირაში 2 სიხშირით, ყოველ სამშაბათს და შაბათს შესრულდება.

Flydubai

არაბთა გაერთიანებული საამიროების ერთ-ერთი წამყვანი ავიაკომპანია ბათუმის აეროპორტში 3 წლიანი პაუზის შემდეგ დაბრუნდა. ფრენები ბათუმსა და დუბაის შორის ყოველ ოთხშაბათს, პარასკევსა და კვირას სრულდება.

Air Arabia Abu Dhabi

საქართველოს საავიაციო ბაზარს კიდევ ერთი დაბალბიუჯეტური ავიაკომპანია შეუერთდება. არაბთა გაერთიანებული საემიროების ავიაკომპანიამ, Air Arabia Abu Dhabi-მ 1 ივლისიდან დაიწყო ოპერირება თბილისის საერთაშორისო აეროპორტში.

აბუ დაბი – თბილისი – აბუ დაბის საჰაერო ხაზზე რეისები კვირაში 3 სიხშირით, ყოველ ოთხშაბათს, ხუთშაბათს და კვირას სრულდება.

Kuwait Airways

ქუვეითის სახელმწიფოს ავიაკომპანიამ, Kuwait Airways-მა, თბილისის მიმართულებით პირდაპირ ავიამიმოსვლა განაახლა. ავიაკომპანია ელ ქუვეითი – თბილისი – ელ ქუვეითის საჰაერო ხაზზე ფრენებს კვირაში 2 სიხშირით, ყოველ ორშაბათს და პარასკევს ასრულებს.

FlyArystan

ყაზახურმა დაბლაბიუჯეტურმა ავიაკომპანიამ კიდევ ერთი მიმართულება დაამატა ქუთაისის საერთაშორისო აეროპორტში. 14 ივლისიდან ავიაკომპანიამ ოპერირება შიმკენტი – ქუთაისი – შიმკენტის საჰაერო ხაზზე დაიწყო. ორ ქალაქს შორის ფრენები ყოველ ოთხშაბათს და კვირას სრულდება.

FlyArystan -ი დღეისათვის ქუთაისის მიმართულებით ფრენებს უკვე ასრულებს ​ატირაუდან, აქტაუდან და ნურსულთანიდან.

Flynas

საუდის არაბეთის სამეფოს დაბალბიუჯეტიანი ავიაკომპანია Flynas-ი ფრენებს უკვე ასრულებს 3 ქალაქიდან, რიადიდან, ჯედადან და დამამიდან თბილისის და ბათუმის საერთაშორისო აეროპორტებში.

ავიაკომპანიამ კიდევ ერთი მიმართულება დაამატა და უკვე ქასიმსა და თბილისს შორის ასრულებს ავიარეისებს. ქასიმის – თბილისი – ქასიმის საჰაერო ხაზზე ფრენები კვირაში 3 სიხშირით, ყოველ სამშაბათს, ხუთშაბათს და შაბათს სრულდება.