საქართველოს აეროპორტების მზარდი დინამიკა: 2025 წლის პირველი ნახევრის შედეგები

2025 წლის პირველ ექვს თვეში საქართველოს აეროპორტებმა მგზავრების რაოდენობის მნიშვნელოვანი ზრდა დააფიქსირეს. ჯამში, აეროპორტები 3,654,063 მგზავრს მოემსახურნენ, რაც 2024 წლის ანალოგიურ პერიოდთან შედარებით 14%-ით მეტია. ეს მაჩვენებელი ქვეყნის საავიაციო სექტორის მზარდ დინამიკას უსვამს ხაზს.

საავიაციო ბაზრის ლიდერი ავიაკომპანიები 

საავიაციო ბაზარზე ლიდერის პოზიციას კვლავ უნგრული ბიუჯეტური ავიაკომპანია Wizz Air ინარჩუნებს. ის ბაზრის 18%-ს ფლობს და 2024 წლის პირველ ნახევართან შედარებით მგზავრების რაოდენობა 16%-ით გაზარდა. იანვრიდან ივნისის ჩათვლით, ავიაკომპანიამ 642,956 მგზავრი გადაიყვანა.

მეორე ადგილზე კიდევ ერთი ბიუჯეტური გადამზიდავი, Pegasus -ია, რომელიც ბაზრის 8%-იან წილს ფლობს. ამ პერიოდში კომპანიამ 8%-იანი ზრდა აჩვენა და ჯამში 284,984 მგზავრს მოემსახურა.

ქართული ავიაკომპანია Georgian Airways მესამე პოზიციას იკავებს, ასევე ბაზრის 8%-იანი წილით. რუსეთთან პირდაპირი ფრენების აღდგენის შემდეგ, ავიაკომპანიამ მგზავრთა ნაკადი მნიშვნელოვნად გაზარდა და ბაზრის ერთ-ერთი მთავარი მოთამაშე გახდა. 2024 წლის იანვარ-ივნისთან შედარებით, Georgian Airways-ის მგზავრების რაოდენობა 17%-ით, 272,568-მდე გაიზარდა.

 

წინა წლების ლიდერი, Turkish Airlines, ამ პერიოდში მეოთხე ადგილზე გადაინაცვლა. ავიაკომპანიამ 268,959 მგზავრი გადაიყვანა, რაც 6%-იანი შემცირებაა წინა წელთან შედარებით.

ხუთეულს ასრულებს Azerbaijan Airlines (AZAL) რომლის ბაზრის წილი 6%-ია. კომპანიამ 222,237 მგზავრი გადაიყვანა, რაც 15%-იანი ზრდაა წინა წელთან შედარებით.

აღსანიშნავია, რომ Turkish Airlines-ის შვილობილი კომპანია Ajet-ის მიერ გადაყვანილი მგზავრები ცალკე აღირიცხება. 2025 წლის პირველ ნახევარში Ajet-მა 54,326 მგზავრს მოემსახურა, რაც არ შედის Turkish Airlines-ის საერთო სტატისტიკაში.

2025 წლის პირველი ნახევრის მონაცემები ნათლად აჩვენებს საქართველოს საავიაციო ბაზრის მზარდ პოტენციალს. 14%-იანი ზრდა მოწმობს ქვეყნის, როგორც რეგიონული სატრანზიტო ჰაბის, მნიშვნელობის ზრდას. მოცემული ტენდენციები მიანიშნებს საქართველოს საავიაციო სექტორის განვითარებაზე და სამომავლოდ კიდევ უფრო მეტი ზრდის მოლოდინზე.

Avia.ge – 8 წელი თქვენს სამსახურში! საიმედო პარტნიორი მოგზაურობაში. დაგვირეკე: 551 907 907