2024 წლის 27 ივნისს, საქართველოსა და კორეის რესპუბლიკის საავიაციო ხელისუფლებებს შორის, ხელი მოეწერა ურთიერთგაგების მემორანდუმს. საქართველოს დედაქალაქში გამართული მოლაპარაკებების ფარგლებში, საავიაციო უწყებების მიერ განხილულ იქნა საქართველოსა და კორეის რესპუბლიკას შორის რეგულარული ავიამიმოსვლის დაწყების ტექნიკური ასპექტები, მათ შორის, საავიაციო ბაზრებზე არსებული ვითარება, ძირითადი მარეგულირებელი სტანდარტები და ფრენის სიხშირეები. ამის შესახებ ინფორმაციას, სამოქალაქო ავიაციის სააგენტო ავრცელებს.
უწყების ცნობით, გაფორმებული ურთიერთგაგების მემორანდუმის შესაბამისად განისაზღვრა ფრენის სიხშირეები: საქართველოსა და კორეის ავიაკომპანიებს, უფლება ექნებათ, რეგულარული სამგზავრო/სატვირთო ფრენები კვირაში 7 სიხშირით განახორციელონ. საქართველოსა და კორეის საავიაციო უწყებები შეთანხმდნენ, რომ აღნიშნული პროცესის ხელშესაწყობად, აქტიურად გააგრძელებენ მუშაობას.
ცნობისთვის, საქართველოსა და კორეის რესპუბლიკას შორის ჩარტერული რეისების განხორციელება, 2018 წელს დაიწყო. ავიაკომპანია Korean Air -მა საქართველოს მიმართულებით სეზონური ფრენები, 2024 წლის მაის-ივნისშიც შეასრულა. რეისები თბილისი ინჩეონი ინჩეონი თბილისი -ს საჰაერო ხაზზე შემოგვთავაზა.