ზამთრის ტურიზმის მოყვარულებისთვის ევროპაში დასვენება სულ უფრო ძვირი სიამოვნება ხდება. Euronews-ის მიერ გავრცელებული უახლესი კვლევის თანახმად, 2015 წლიდან მოყოლებული, ინფლაციის გათვალისწინებით, ევროპულ კურორტებზე თხილამურებით სრიალის ფასი საშუალოდ 34.8%-ით გაიზარდა.
თუმცა, ალპების ძვირადღირებული კურორტების ფონზე, გამოცემა ტურისტებს ალტერნატიულ, ბევრად უფრო ხელმისაწვდომ მიმართულებებს სთავაზობს. ამ სიაში ლიდერობენ საქართველო და ბულგარეთი, რომლებიც ვიზიტორებს დაბალ ფასებსა და ხარისხიან გამოცდილებას ჰპირდებიან.
საქართველო – ველური ბუნება და უხვი თოვლი
სტატიაში განსაკუთრებული ყურადღება ეთმობა საქართველოს, როგორც ევროპის ზამთრის ტურიზმის „ფარულ მარგალიტს“. Euronews-ის შეფასებით, საქართველოს მთავარი უპირატესობა, დაბალ ფასთან ერთად, თოვლის საიმედო საფარია.
მაშინ, როდესაც გლობალური დათბობის გამო დაბალ სიმაღლეზე მდებარე ევროპული კურორტები თოვლის დეფიციტს განიცდიან, კავკასიონის მთები თავისი სიმაღლით იგებს. ისეთი კურორტები, როგორიცაა გუდაური და თეთნულდი, ზღვის დონიდან 2000-დან 3000 მეტრამდე სიმაღლეზე ვრცელდება. ეს ბუნებრივი უპირატესობა საქართველოს კურორტებს ევროპაში ერთ-ერთ ყველაზე ეკოლოგიურად სუფთა ადგილად აქცევს აქ იშვიათად არის საჭირო ხელოვნური თოვლის გამოყენება.
თავგადასავალი vs „გაპრიალებული“ ალპები
გუდაურის სათხილამურო სკოლის, Vagabond Adventures-ის ხელმძღვანელი, პეტრ მაჯერი გამოცემასთან საუბრისას აღნიშნავს, რომ საქართველო ტურისტებს სთავაზობს უნიკალურ, ველურ და თავგადასავლებით სავსე ატმოსფეროს, რასაც ვერ ნახავთ ალპების ზედმიწევნით მოწესრიგებულ და „გაპრიალებულ“ სოფლებში.
„ის, რაც საქართველოს აკლია, არის ინფრასტრუქტურა, რომელიც ზოგჯერ მცირედით ჩამორჩება ევროპული გიგანტების განვითარების დონეს, თუმცა სანაცვლოდ იღებთ ემოციას და ბუნებრიობას“ ამბობს მაჯერი.
ფასები და მოგზაურობის დაგეგმვა
საქართველო კონკურენტებთან შედარებით ფინანსურად ძალიან მომგებიან პოზიციაშია:
- დღიური აბონემენტი: დაახლოებით 25 ევრო.
- სრული აღჭურვილობის ქირაობა: დღეში საშუალოდ 22 ევრო.
- საუკეთესო შეთავაზება: სეზონური აბონემენტი, რომელიც დაახლოებით 200 ევრო ღირს და საქართველოს ყველა სათხილამურო კურორტზე შეუზღუდავ წვდომას გაძლევთ.
- გარდა ადგილზე არსებული დაბალი ხარჯებისა, ევროპელ ტურისტებს ხშირად ავიაბილეთები საქართველოში ჩამოსასვლელად უფრო იაფი უჯდებათ, ვიდრე შვეიცარიის ან ავსტრიის ძვირადღირებულ კურორტებამდე მგზავრობა.
აქტიური დღის დასასრულს კი ვიზიტორებს ელოდებათ ქართული სამზარეულო ხინკალი და ხაჭაპური, რაც ძალების აღდგენის საუკეთესო და გემრიელი საშუალებაა.
ბულგარეთი – ევროპული კლასიკა ბიუჯეტურ ფასად
სტატიაში საქართველოს გვერდით მოხსენებულია ბულგარეთიც, რომელიც წლებია ინარჩუნებს სტატუსს, როგორც ევროპაში ერთ-ერთი ყველაზე იაფი სათხილამურო მიმართულება. ბულგარეთი ტურისტებს სთავაზობს კარგად განვითარებულ კურორტებსა და სერვისს, რომელიც მნიშვნელოვნად ჩამოუვარდება დასავლეთ ევროპის კურორტების ფასებს. შესაბამისად, თუ ზამთრის არდადეგების დაგეგმვისას იაფი ავიაბილეთები და ხელმისაწვდომი სერვისი თქვენთვის პრიორიტეტია, საქართველო და ბულგარეთი საუკეთესო არჩევანია.
Avia.ge – 8 წელი თქვენს სამსახურში! საიმედო პარტნიორი მოგზაურობაში. დაგვირეკე: 551 907 907