ევროპაში მოგზაურობის მოყვარულთათვის და განსაკუთრებით ქართველი მგზავრებისთვის, რომლებიც ქუთაისის საერთაშორისო აეროპორტიდან დაბალბიუჯეტიანი ფრენებით ხშირად სარგებლობენ, ხელბარგის პოლიტიკა ყოველთვის აქტუალურია. ავიაკომპანია easyJet-ის გენერალურმა დირექტორმა, კენტონ ჯარვისმა, ევროკავშირის ინიციატივა მკაცრად გააკრიტიკა, ინიციატივა ხელბარგის უფასო გადატანის ერთიანი სტანდარტების დაწესებას ისახავს მიზნად. ჯარვისმა ამ ყველაფერს „გიჟური იდეა“ უწოდა.
რა ხდება და რატომ აღშფოთდა ავიაკომპანია
ევროპარლამენტმა მხარი დაუჭირა რეგულაციას, რომელიც მგზავრებს უფლებას აძლევს, სავარძლის ქვეშ მოთავსებულ პირად ნივთთან (მაგალითად, ზურგჩანთა ან ხელჩანთა) ერთად, ბორტზე მცირე ზომის ჩანთა დამატებითი საფასურის გარეშე აიტანონ. ეს ნიშნავს, რომ ავიაკომპანიებს აეკრძალებათ დამატებითი გადასახადის დაწესება იმაზე, რაც ისედაც მგზავრის საკუთრებაა.
თუმცა, easyJet-ის ხელმძღვანელის თქმით, ეს გადაწყვეტილება პოლიტიკოსების მხრიდან რეალობის არცოდნას მოწმობს. მისი არგუმენტი მარტივია: თვითმფრინავების სალონებში საკმარისი ადგილი იმისთვის, რომ ყველა მგზავრმა დამატებითი ბარგი განათავსოს, ფიზიკურად არ არის.
ფინანსური და ლოგისტიკური შედეგები
ჯარვისი განმარტავს, რომ ამ რეგულაციას სერიოზული ფინანსური და ლოგისტიკური შედეგები მოჰყვება, რაც საბოლოო ჯამში მომხმარებლის ჯიბეზე აისახება:
- ავიაბილეთების გაძვირება: ვინაიდან ბარგის საფასური easyJet-ის შემოსავლის მნიშვნელოვან ნაწილს შეადგენს, ამ ნაკადის დაკარგვა გადამყვანს აიძულებს, ავიაბილეთების საბაზისო ფასები ყველა მომხმარებლისთვის გაზარდოს. ეს კი დაბალბიუჯეტიანი ფრენების (Low-cost) არსებულ მოდელს ფუნდამენტურად დააზიანებს.
- რეისების დაგვიანება: სალონში ბარგის გადაჭარბებული რაოდენობა ჩასხდომის (Boarding) პროცესის შეფერხებას გამოიწვევს. მგზავრები თავისუფალი ადგილის ძებნაში დიდ დროს დახარჯავენ, რაც რეისების დაგვიანებას გამოიწვევს, საბოლოო ჯამში კი ეს ყველაფერი ფინანსურად ისევ ავიაკომპანიაზე აისახება, რადგან დაგვიანებულ რეისებზე მათ ფრენის კომპენსაცია ეკისრებათ, რაც მათთვის არახელსაყრელია
რას ნიშნავს ეს ქართველი მგზავრებისთვის
ქართველი მოგზაურებისთვის, რომლებიც მხოლოდ ზურგჩანთით ფრენას მიჩვეულები არიან, ეს სიახლე ორმხრივია. ერთის მხრივ, უფასო ჩანთა მიმზიდველად ჟღერს, მაგრამ მეორეს მხრივ, ავიაკომპანიების გაფრთხილება რეალურია – უფასო დამატებითი ბარგი შესაძლოა ავიაბილეთის გაძვირებით გადავიხადოთ.
easyJet-ის მტკიცებით, არსებული სისტემა, სადაც მგზავრები მხოლოდ რეალურად საჭირო სერვისებში იხდიან, მომხმარებლისთვის გაცილებით მომგებიანი და სამართლიანია. ისინი მიიჩნევენ, რომ ევროკავშირის ჩარევა ბაზარზე თავისუფალ კონკურენციას ზღუდავს და ავიაკომპანიებს ბიზნეს მოდელის შეცვლას აიძულებს.
დებატები გრძელდება და უახლოეს მომავალში გვეცოდინება, რამდენად მკაცრად გატარდება ევროკავშირის ახალი წესები და როგორ უპასუხებენ მას დაბალბიუჯეტიანი ავიაგიგანტები.
Avia.ge – თქვენი მოგზაურობის ერთგული მეგობარი. დაგვირეკე: 551 907 907