2025 წელს ყველაზე გავლენიანი პასპორტები

მოგზაურობისთვის პასპორტი უმნიშვნელოვანესი დოკუმენტია, თუმცა მისი გავლენა და სტატუსი შესაძლოა განსხვავდებოდეს. Hanley & Partners ყოველწლიურად აქვეყნებს რეიტინგს, რომელიც ასახავს, რამდენ ქვეყანაში შეუძლიათ ამა თუ იმ ქვეყნის მოქალაქეებს უვიზოდ შესვლა ან ვიზის ადგილზე აღება.

მაღალი რეიტინგის მქონე პასპორტების მფლობელებს მოგზაურობა გაცილებით უმარტივდებათ, რადგან მათთვის ვიზის წინასწარი მიღება საჭირო არ არის და ისინი მკაცრ პასპორტ კონტროლსაც მარტივად გადიან. ამიტომ ასეთი პასპორტები ყველაზე სასურველად ითვლება.

2025 წლის Hanley Passport Index-ის მიხედვით, რეიტინგის სათავეში სინგაპური აღმოჩნდა, რომლის მოქალაქეებს 193 ქვეყანაში შეუძლიათ უვიზოდ მოგზაურობა. იაპონიისა და სამხრეთ კორეის მოქალაქეებს ეს უფლება 190 ქვეყანაში აქვთ. გერმანია და საფრანგეთი, რომლებიც 2024 წელს პირველ ადგილს იყოფდნენ, ახლა მესამე ადგილზე ჩამოქვეითდნენ. პირველი 15-ეულში დანარჩენი ქვეყნები უმეტესად ევროპული სახელმწიფოებია.

2025 წლის ყველაზე გავლენიანი პასპორტები:

• 1-ლი ადგილი სინგაპური – 193 ქვეყანა.
• 2-ე ადგილი იაპონია, სამხრეთ კორეა – 190 ქვეყანა.
• 3-ე ადგილი დანია, ფინეთი, საფრანგეთი, გერმანია, ირლანდია, იტალია, ესპანეთი – 189 ქვეყანა.
• 4-ე ადგილი ავსტრია, ბელგია, ლუქსემბურგი, ნიდერლანდები, ნორვეგია – 188 ქვეყანა.

აშშ-ის პასპორტი კიდევ უფრო ჩამოქვეითდა

რაც შეეხება აშშ-ის პასპორტს, მოწინავე პოზიციებს აღარ იკავებს. 10 წლის წინ იგი ტრადიციულად პირველ ან მეორე ადგილს იკავებდა, ახლა კი ამერიკის პასპორტის მფლობელებს ვიზის გარეშე მხოლოდ 183 ქვეყნაში შეუძლიათ გამგზავრება.

რეიტინგში აშშ-ს ოდნავ უსწრებენ ისეთი ქვეყნები, როგორიცაა კანადა (უვიზოდ 185 მიმართულება), დიდი ბრიტანეთი (186) და ავსტრალია (186).

რაც შეეხება საქართველოს, უვიზო მიმოსვლა ან ჩასვლისას ვიზის აღების უფლება 122 ქვეყანასთან აქვს და Hanley Passport Index-ის რეიტინგში 42-ე ადგილს იკავებს.

ყველაზე სუსტი პასპორტის მქონე ქვეყნები, 2025 წლის Hanley Passport Index-ის მიხედვით:

• 95-ე ადგილი სომალი – 33 ქვეყანა
• 96-ე ადგილი პაკისტანი – 32 ქვეყანა
• 96-ე ადგილი იემენი – 32 ქვეყანა
• 97-ე ადგილი ერაყი – 30 ქვეყანა
• 98-ე ადგილი სირია – 27 ქვეყანა
• 99-ე ადგილი ავღანეთი – 25 ქვეყანა

ეს ქვეყნები საერთაშორისო დიპლომატიური გამოწვევებისა და პოლიტიკური არასტაბილურობის გამო მსოფლიოში ყველაზე სუსტი პასპორტების სიაში მოიაზრებიან. მათი მოქალაქეებისთვის საზღვარგარეთ მოგზაურობა ხშირად რთული და ხანგრძლივი ბიუროკრატიული პროცესებით არის გაძნელებული.

საყურადღებოა, რომ პასპორტის ინდექსები რეგულარულად ახლდება, ვინაიდან ქვეყნების სავიზო პოლიტიკა და საერთაშორისო ურთიერთობები მუდმივად იცვლება. შესაბამისად, მონაცემები, რომლებიც დღეს აქტუალურია, შესაძლოა გარკვეული პერიოდის შემდეგ შეიცვალოს.

8 წელი თქვენს სამსახურში! Avia.ge – საიმედო პარტნიორი მოგზაურობაში. დაგვირეკე: 551 907 907