ზაფხულში ავიაბილეთებზე ფასების მკვეთრი ზრდის შემდეგ მათი ფასების სტაბილიზაცია გამოიკვეთა. როგორც მოგხსენებათ, საქართველოს ავიაბაზარზე, რამდენიმე დაბალბიუჯეტიანი ავიაკომპანია, საკმაოდ იაფ ავიაბილეთებს გვთავაზობდა. თუმცა, მათმა ფასმაც ბოლო პერიოდში საკმაოდ მოიმატა.
2022 წლის დასაწყისიდან ევროპულ მიმართულებებზე ავიაბილეთების ფასი საკმაოდ მაღალი იყო, რადგან პანდემიის შემდეგ უმეტესი შეზღუდვების მოხსნის გამო მოგზაურობაზე მოთხოვნა გაიზარდა.
Skytra-ს თანადამფუძნებელმა და აღმასრულებელმა დირექტორმა, ელისა ვებერმა, განაცხადა რომ, ეკონომ კლასის ავიაბილეთების საშუალო ფასი, ევროპის შიგნით ფრენებზე, თანდათან დასტაბილურდა და ივლისის ბოლოს კლებაც კი დაიწყო.
აგვისტოს დასაწყისში, CWT-ის ანალიტიკოსებმა განაცხადეს, რომ ავიაბილეთების ფასების ზრდა მოსალოდნელია 2023 წელსაც.